Test da scalem
Gio varsaquants onns porschan las scolas da musica da Coira, Plaun, Landquart, Viamala, Seurselva e Grischun Central tests da scalem. Scolars da musica e lour scolasts survignan dad experts en rapport tgi mossa igl livel actual e dat impuls per la cuntinuaziun dall’instrucziun da musica. Per scolars da musica dallas scolas da musica numnadas è la participaziun gratuita. Igls test da scalem vignan spurschias pigls instrumaints suandonts : instrumaints a flo da sturs, ghitarra, clavazign, arpa, flauta traversa, clarinetta, saxofon, violina, viola e cello. Tiers en toc da schelta vign pretendia en toc dalla glista digl scalem correspondent ed en toc d’ensemble. An pe digl toc d’ensemble pò er neir tscharnia igl test da teoria.
Pertge en test da scalem ?
L’instrucziun da musica ò scu fegnameira da promover las abilitads digl scolar da musica an moda individuala. An l’instrucziun singula u an gruppas pitschnas vign risguardo la persunalitad ed igl tempo d’amprender digl scolar. Uscheia èn previas nigns attestats u examens. Tuttegna ègl impurtant d’aveir fegnameiras an l’instrucziun da musica per migliurar ed optimar las abilitads musicalas. Per chel muteiv realiseschan bleras scolas da musica an Svizra gio dadei cun grond success tests da scalem. Per scolar e scolast èn chels tests da scalem ena plattafurma impurtanta e necessaria tgi promova e mutivescha la cuntinuaziun dall’instrucziun da musica.